الحبوبه و العولمه

السلام عليكم ورحمة الله تعالي وبركاته

مره وكنت في البلد بتونس معي الحبوبه ونسه عاديه كده وباساله عن احواله

والله ياوليدي كوسين والحمد لله بس المشغوليي كتيري..

المهم في نهاية الونسه دخلت اللوضه ومرقت اللبتوب وجيت ماشي بي جنبها

ده شنو الشايلو في ايدك ده؟

ده يايمه الابتوب

الابتوك شنو ياجنه؟

مالابتوك يايمه لابتوب

الخرابه... هوده الابتوب, ده زي العند ولد ناس فلان

ايوه يايمه

مخير الله.. تلقي ولد ناس فلان مدنقر فيهو طوالي وبخرمج فيهو كده . زي الكديسي البتلاعبلها في ريشي كده ده

اسي ياوليدي ده بسو بيهو شنو؟

بدخلو فيهو اي شي زي الصور و الموسيقي والمعلومات وبخلو بيهو النت

بري يا يمه زمنه ما كن فيهو كلام زي ده العندو تلفزيون ملون ماخلي حاجه ومكره جابو السنمه في بيت ناس فلان المطوفش داك عاد شوف النضم و البلاوي السوها قالو شغلو ليهم الفلم والشاشه الكبيري دي قاعدين تحته كان النفرلا الزمن داك بي تلاتي قروش والقطرفي الفلم شغال والصوت العالي وفجا ظهر من بعيدالقطر في الشاشه ماشي عليهم ناس البلد كلهم قامو جارين بره السنمه وبيكوركو يا ناس البلد القطر جاكم في الليلي ديك مافي زول نام للصباح والمطوفش يضحك فيهم لليلي..؛

ده يايمه ممكن تتكلمي بيهو معي جلال في السعوديه وتكوني شايفاهو قدامك

اقشر بيني لاساي شان لقيتنا مافاهمين بعدين بكلملك عمك واللهي الكلام ده يطلع ساي الي تشوف ليك صرفي

اه من اليوم داك طوالي بشغلو جمبها وبقعد وبسمعا الاغاني...

يوم جيت من مشوار وشغلتي جمبها الابتوب... زحت من جمبي استقربت مالك ياحجه زح الخرابه ده من جمبي ليه حجه فلان قالت الابتوك ده بيجيب السرطان قمت اضحكت شويه كده ومشيت عليها زح من جمبي بقولك ومن اليوم داك مابتقعد معاي وانا شايل اللبتوب

........ترقبو البقيه