اضحك من قلبك معي المسطول

**عثمان جكنون** الأربعاء سبتمبر 22, 2010 3:50 am

اثنين مساطيل .. راكبين عربية الأول سايق والثاني راكب ورا .. الراكب ورا سطل سطلة شديدة ..ماشين في شارع النيل .. السايق شاف الشجرة (مضروبة جير أبيض نصها التحت) أفتكرها عسكري حركة .. راح واقف .. لما شافها شجرة ضحك وطلع طوالي .. بعد مسافة الثاني من ورا .. قال ليه .. التافه دا قال ليك شنو ؟

في مسطول قال لي زميلو: أمبارح اليوم كلو بالي مشغول رد عليهو زميلو : يمكن يكون في زول رافع السماعة

واحد مسطول قاعد جنب ولد وابوهو الاب قال لي ولدو يا ولد جيب لي مويه اشرب الولد ابي وعمل مصهين المسطول قال لي ابوه ده ولد قليل ادب امشي اشرب وجيب لي معاك يا ابوي

مسطول مشى هو وأمه وابوه عشان يخطبوا لمن رجع الجماعة قالوا ليه ورينا الحصل شنو اوعى يكون حرجوك بس ؟؟؟؟ قال ليهم والله فيفتي فيفتي ... قالوا كيف يعني .قال ليهم أنا وأبوي وأمي موافقين وهي وأمها وأبوها ما موافقين...

مسطول تاني قال ليهورأيك شنو في المراة (العصرية) ؟؟؟ قال ليهم أحسن من طلوع الليل

مسطول كل ما يلمس مكان فى جسمه يوجعه... مشى المستشفى لقو أصبعو مكسور

مسطول اتصل بوكالة سفر سال السكرتيرة ( لوسمحتى الرحلة بين السودان وكندا بتاخد كم ساعة ؟) قالت ليهو ( لحظة بس) قال ليها ( طيب شكرا)

مسطول سأل الدكتور قال ليهو : «فهمني كيف تحللوا البول وتحرموا الخمرة ؟؟ !!..

واحد مسطول جابو للقاضي .. القاضي قال ليه لو قلت لي عشرة حاجات تعملا من الصباح تبدأ بحرف الباء بفكك ... المسطول قال ليهو : بجيبها - بختها - بفتفتها - بلفها بولعها - بشربها - بتكيف - بنسطل - بطفيها – بنوم

حقيقة شايفك قدامي من زماااان وماقادر اوصل ليك!! وكل ما احاول اقرب منك اخاف تجرحيني!! ومرات كثيرة افكر فيك القاكي انتي جارية وكل ما اسعى افهمِك القاكي بتلفي وتدوري!! فهميني الحاصل شنو؟؟ (مسطول بتكلم مع مروحة)

مسطول قال لي مرته والله الدنيا دي بقت زي جنينة الحيوانات: الواحد يصحي من النوم زي الديك ويمشي يشتغل زي الحمار ويجي راجع البيت زي الكلب وفي النهاية قاعد ليهو مع بقرة

مسطول بيسأل في مسطول تاني ( بالله عليك القميص دا ماشي مع البنطلون) رد عليه المسطول التاني : و هو البنطلون ماشي وين!!

مسطول خطيبته قالت ليه أنا أهم حاجة عندي (ألإخلاص) قال ليها وأنا أهم حاجة عندي الحمدو

مسطول شاكل امه مشي جاب كرتونة لبن وقال ليها دا البيني وبينك

مسطول ضيع أمه في السوق مسك واحد وسأله:ماشفت واحده تمشي مامعاها واحد يشبهني ...

مسطول كان ماشى لقى الناس بصلوا فى (زاويه) و الارضية كانت برش قام صلى معاهم، بعد الصلاة خلصت الناس مشت الا الامام و المسطول كان غالبو يقوم ، قام الامام قال للمسطول : يا ولدى يلا لفها، المسطول : يا مولانا انت جادى ؟؟

عريس مسطول اصحابوا قالو ليو ماشين نجيب التلج .. قال ليهم سمح عزلوا الساااااااااااااااااااااقط

مسطول ورجل متدين وشرطى ساكنين مع بعض يوم المسطول قال لصاحبة المتدين صحينى صلاة الفجر عشان انا مسافر قام صحاه المسطول لبس هدوم الشرطى ومشى لما الشمس طلعت عاين لقى روحه لابس هدوم الشرطى قال عليك الله المسطول فينا منو اقول ليه صحينى يصحى الشرطى

اثنين عساكر مساطيل في حفلة بنادي الضباط شا فوا العروس لابسه فستان كله نجوم واحد سأل صحبه دي رتبتها شنو ؟

أربع مساطيل راكبين عربية أنقلبت بيهم لمن طلعو منها و شافوها مطفقة قالو ننفخ في العادم نستعدل العربية تلاته بينفخو و احد واقف بعيد بضحك الجماعه أستغربو الزول ده بضحك ليه ؟ سألو البضحك مالك يا زول ؟؟؟؟؟ قال أنتو حمير ............تنفخو و القزاز مفتوح

مسطول في الحج طائف عكس .. قالوليهو مالك .. قال زايد شوط وعايز يمسحو

مسطول سألوه شغال شنو قال بالصباح مع اخوي وبالمسا مركلس ، قالوا ليه اخوك شغال شنو : قال بالمسا معاي وبالصباح مركلس

تصبح ذي كديس من الصباح بتتمطه ما عارف الحياة في ذاتها اكبر ورطة
يوم تديك عسل ويوم تملأ خشمك شطة والمكنوب عليك ما منو ابداً نطة ( مسطول حكيم)

شيخ شرب بنقو وصلى بالناس الجمعة ومشى البيت . العصر الناس مشوا قالوا ليه : قلت غزوة بدر بالطيارات قلنا عادي قلت صلاح الدين خشا القدس بالكيماوي قلنا ماشي ، لكن أمية باع بلال بخمسة مليون دولار لبرشلونة دي قوية

تلاتة مساطيل سرقوا بنك وجروا دخلوا مزرعة والشرطة وراهم طوالي قالوا يستخبوا في المزرعة لقوا ليهم تلاتة شوالات خيش دخلوا فيها وقفلوها عليهم الشرطة لما جات فتشوهم وما لقوهم طبعا قام واحد من الضباط شاف الشوالات مشى عليهم وضرب الشوال الاول شلوت قوي المسطول الاول صاح فيه : كوكوكوكووك (يعني صوت دجاج) الضابط خلاه قال ده جداد التاني ادوهو شلاليت برضو عمل صوت : ( قاااقققاققق) يعني صوت بط الضابط قال ده بط خلاهو مشى للتالت واداه شلوت قوي وشلوت تاني قوي مافي صوت وشلوت اقوى مافي صوت والشلوت الرابع حاار قام المسطول طلع من الشوال متالم وقال للضابط : ياخي بطاطس بطاطس اكورك اقول شنو ؟؟؟